Bona Pasca de Nadale e unu menzus comintzu de annu

Dettagli

Pubblicato Lunedì, 24 Dicembre 2018 10:59

Scritto da Antonio Moro

Il presidente del Partito Sardo d’Azione, Antonio Moro, in una lettera scritta in lingua sarda e indirizzata ai consiglieri nazionali del PSd’Az ed a tutti i Sardisti, nell'occasione dei tradizionali auguri di buone feste, ricorda il nuovo banco di prova che aspetta i 4 Mori nel 2019: riportare un sardista alla guida della Sardegna. «Il governo della nostra Regione – si legge nella lettera - è la sfida che ci attende e sono certo che sarà l’occasione per vederci tutti in prima linea e contribuire così a fare più grande il nostro glorioso partito e migliore la Sardegna con il convinto sostegno a Christian Solinas, per offrire ai sardi una guida autenticamente e orgogliosamente sardista».

*** *** ***

Dia aer cherfidu a bos abbojare cara a cara, sena sas formalidades de una lìtera iscrita a machina, ma sos  impignos in Senadu cun sas votatziones de sa leze Finantziaria,  sas tratativas pro sas eletziones pro su sèberu de unu deputadu nou in Casteddu, sas eletziones regionales imbenientes e sas festas de fine ’e annu non nos an permìtidu de fàghere sa prima riunione de su Consizu Natzionale nou.

De custu nd’apo dolu mannu e dimando iscuja a totucantos ma bos asseguro chi, intro sas primas 20 dies de su mese de ‘Ennarzu 2019, amus a fàghere su primu abboju de su Consizu nou, bessidu, cun s’acordu de totus, dae su Cungressu Natzionale de Casteddu, su ’e 34° de s’istòria nostra. Prima, però, tocat a ponner in caminu sas novidades chi sun intradas in s’Istatutu e chi pertocant s’organizatzione politica e finantziaria de su Partidu.

Su chi contat de pius pro nois, est craru, est a sighire in s’atzione  politica in custu mamentu istòricu pro su Partidu chi a pustis de 34 annos dae s’eletzione de Mariu Melis a sa ghia de sa Regione Sarda, torrat a leare sa prima pàndela de s’alleantzia de Tzentru-dresta, civica e sardista. Comente ischides totucantos, su 30 de su mese ’e Santu Andria, in Barùmini, su Partidu Sardu e sas àteras fortzas de su Tzentru-dresta (Lega, Forza Italia, Fratelli d’Italia, Udc, Uds, Riformatori, Fortza Paris, Sardegna 20Venti, Energie per l’Italia e Movimento civico Sardegna), an inditadu su segretariu natzionale nostru, Christian Solinas, che candidadu a sa Presidentzia de sa Regione.

Est un’onore mannu pro su Partidu Sardu. Como, pro nois, s’isfida de su benidore est su guvernu de sa Regione. At a esser, nde semus seguros, s’ocasione pro nos ponner totucantos in prima linea pro dare una lughe noa a su Partidu e pro torrare alenu a sa Sardigna. Pro fagher custu tocat a azuare a Christian e a sos candidados nostros, pro dare a sos sardos una ghia de gabbale, sìnchera e segura. Pro la segare in curtzu: su chi bi cheret est una ghia chi tenzat sa terra nostra in coro e s’idea sardista in sa mente.

So seguru chi su Consizu Natzionale at a sighire sos inditos de su Cungressu, massimamente pro su chi pertocat su programma e sos temas de pius importu de su die pro die: s’amparu de s’insigna e de s’istòria longa de su Partidu chi luego at a lòmpere sos chent’annos. Ma, pruschetotu, so seguru chi amus a costoire e a dare valore a sa sienda pius rara chi su Cungressu nos at istrinadu: s’unidade de su Partidu.

Est custu s’impignu chi mi leo: tribagliare cun ànimu e responsabilidade pro difendere, lassende a una banda regulas e reguleddas, s’unidade de su Partidu Sardu. Creo, difatis, chi s’unidade de su Psd’Az siat sa prima pedra pro fraigare s’unidade de sos sardos e pro aere una Sardigna pius libera, uguale e zusta. Una Sardigna noa cun pius ocasiones de tribagliu pro zovanos e disimpreados, pius pagas diferentzias territoriales, economicas e sotziales e pius poderes. Cun sa fieresa de esser sardos chi nos diat un’ispera pius manna pro su tempus benidore.

Ponimus sos sardos e sa Sardigna in chima a su programma de guvernu. Est custu su caminu pro torrare a ponner pe’ in Viale Trento e, mascamente, pro chi su pòpulu sardu torret a abbaidare a sa politica cun ànimu nou a pustis de su disacatu de chimb’annos de guvernu de Tzentru-manca. Una majoria, botzada in sas ultimas eletziones politicas, chi mai che-i como est boghende a pizu s’atza italianista e antisardista chen’’e s’abbizare chi est propriu custa manera de pensare e de pònnere a banda su sardismu chi la rendet politicamente pius dèbbile.

E tando, mi restat nessi de bos augurare una bona Pasca de Nadale e unu menzus comintzu de annu, festas de paghe e de serenidade umpare a sas familias bostras cun s’ispera, ma finamenta cun sa seguresa, chi su 2019 at a esser s’annu de sos Bator Moros cun Christian Solinas presidente de sa Regione.

Fortza paris!

*** *** ***

Antonio Moro – Presidente del Consiglio Nazionale del Partidu Sardu - Partito Sardo d'Azione

• < Prec
• Succ >